Bilbo Zaharra Euskaltegiak, Forum jardunaldiak antolatu ditu beste behin ere. Urtero bezala, euskal idazle baten liburuaren irakurketa egiten da Arriaga Antzokian baina lehenengo eta behin, forum jardunaldiak antolatzen dira, bertan, adituek, obraren inguruko iritzia plazaratu dezaten. Aurten, Jon Miranderen Haur Besoetakoa izan da hautatutako liburua eta beraz, jardunaldietan, liburu polemiko honi buruz mintzatu dira.

Azkue fundazioak Jakintza Librearen jardunaldiak egin ditu aste honetan zehar Bilbon. Bizkaiko Foru Aldundiko Liburutegian eta hiru egunez egin dira jardunaldiak. Bertan hiru gai, hiru proiektu landu eta jorratu dituzte; Wiki-ipuina, Open Space; euskara eta internet XXI.mendean eta euskara sarean josteko mahai ingurua.

Barakaldoko Clara Campoamor Kultur Etxeak, manga eta anime jardunaldiak bilduko ditu igande honetara arte. Motsukora taldeak antolaturiko jardunaldi hauetan, era guztietako ekimenez gozatzeko aukera izango da, besteak beste, bideojolasak, japoniako marrazki bizidunak edota komikiak.